Gibutyag ni Atty. Benjamin Gaspi, Regional Director sa Philippine Drug Enforcement Agency Region 10, nga walay kawani sa buhatan o bisan sa ubang ahensya sa gobyerno sa rehiyon ang nalambigit sa ilegal nga droga.
Matod pa ni Gaspi nga sa kasamtangang administrasyon, wala pay naitala nga namatay atol sa mga operasyon nga gihimo sa ahensya batok sa illegal nga droga.
Gipasigarbo usab niini nga ang tanang lima ka probinsya sa Region 10 nagpadayon sa pagpakgang sa droga pinaagi sa pagdakop sa mga suspek ug pagsiguro nga kini masilotan sa balaod.
Gibutyag usab niini nga taas og conviction rate sa rehiyon batok sa pagyuhot og pagpamaligya sa ilegal nga droga.
Ang PDEA-10 padayon usab sa pagpatuman sa Barangay Drug Clearing Program nga miresulta sa dakong pagkunhod sa drug-affected areas.
Gisaysay ni Gaspi, nga gikan sa 83% nga drug affectation niadtong 2017, mikunhod na kini ngadto sa 15% sa tuig 2025.
Giconsidera kini ni Gaspi isip hulagway ug ebidensya nga epektibo ang mga lakang ug kampanya batok sa illegal nga droga, uban sa suporta sa mga lokal nga panggamhanan, kapulisan, ug komunidad.