Naghitak og mga gapnod ug nagkatag nga basura human sa kusog nga baha nga miigo sa Iligan City, Lanao del Norte kagabii.
Nasayran nga sukad pa kagahapon nakasinati na og padayon nga pag-ulan ang maong lugar, nga gilangkuban sa epekto sa pagsulod sa kayutaan ni Bagyong Basyang.
Tungod sa maong kahimtangan, daghang kabtangan ang nangadaot, lakip na ang mga sakyanan nga gianod sa baha.
Karong adlawa, nagpabilin sa Wind Signal No. 2 ang nasampit nga siyudad ug probinsya tungod sa bagyo nga adunay internasyonal nga ngalan nga Penha.
Usa sa mga barangay nga grabeng naapektuhan mao ang Barangay Mahayahay sa Iligan City, nga padayon karon nga ginabantayan pag-ayo samtang nagpadayon ang epekto sa bagyo.
Kasamtangan, nag-assess ang mga rescue team sa sitwasyon sa lugar ug andam ang mga operasyon aron motubag sa bisan unsang ireport nga emerhensiya.
Ginaawhag usab ang mga residente sa mga delikadong lugar nga magpabiling alerto, motuman sa opisyal nga mga pahibalo, ug mobalhin sa mas taas nga lugar kon magpadayon ang pag-ulan ug pagbaha.