Gisumite na sa mga piskal sa International Criminal Court (ICC) ang ika unom nga batch sa mga ebidensiya batok kang kanhi Pangulong Rodrigo Duterte alang sa kasong crimes against humanity.
Kini usa ka bahin sa pre-trial proceedings sa kaso batok sa kanhing Pangulo may kalabotan sa giingong mga pagpamatay atol sa madugong kampanya kontra droga sa iyang administrasyon. Sa pagkakaron, 267 ka mga items na ang gisumite sa prosekusyon sukad pagsugod sa disclosure of evidence niadtong Abril 30.
Duha na usab ka beses nga nangayo og extension ang mga piskal alang sa pagsumite sa mga dokumento, ug kini giaprubahan sa ICC. Tumong sa extension mao ang paghatag og higayon sa prosekusyon nga maaplikar ang standard redactions sa pipila ka materyales aron maprotektahan ang identidad sa mga testigo ug masiguro ang ilang kaluwasan.
Ang tanang mga dokumento nga gisumite mahimong kabahin sa mga ebidensiyang gamiton sa prosekusyon sa confirmation hearing sa kaso batok kang Duterte nga nakatakda sa Setyembre 23 ning tuiga.Sa maong pagdungog, susihon kung aduna bay igo nga ebidensiya aron ipadayon ang kaso ngadto sa full trial. Kung makumpirma ang mga kaso, posible nga atubangon ni Duterte ang full trial sa ICC.