Ihap sa mga namatay sa nalunod nga MV Trisha Kerstin 3, nikabat na sa 62

Misaka na sa 62 ang kinatibuk-ang ihap sa mga nakalas sa pagkalunod sa MV Trisha Kerstin 3 human narekober ang upat pa ka patay’ng lawas niadtong Martes, Pebrero 17. Ang mga patayng lawas nga gilangkuban sa duha ka lalaki ug duha ka babaye—napalgan sa mga divers duol sa Baluk-Baluk Island sa Basilan, diin nahitabo ang trahedya niadtong Enero 26.

Sa pagkakaron, gihimo pa ang beripikasyon sa pag-ila sa maong mga biktima aron mapahibalo ang ilang mga pamilya. Padayon ang search and recovery operations nga gipangunahan sa Philippine Coast Guard (PCG) ug Philippine Navy, uban ang tabang sa lokal nga kagamhanan ug mga boluntaryo, aron masiguro nga makuha pa ang ubang posibleng biktima sa ilawom sa dagat.