Gisalikway sa International Criminal Court (ICC) ang hangtod 18 ka aplikasyon gikan sa mga biktima sa drug war nga gustong motestigo sa kaso batok kang kanhing Presidente Rodrigo Duterte.
Apan, giklaro ni Kristina Conti, Assistant to Counsel sa ICC, nga ang rason sa dili pagdawat sa ilang aplikasyon mao nga ang mga insidente sa pagkamatay sa ilang mga parenti wala na masakop sa imbestigasyon sa ICC, ug dili tungod kay sayop ang ilang aplikasyon o kulang ang ilang mga dokumento.
Gipasabot usab nga human mibulag ang Pilipinas sa ICC niadtong Marso 2019, ang mga drug war killings nga nahitabo human niini dili na sakop sa imbestigasyon sa internasyonal nga korte.
Bisan pa, giila gihapon sila nga mga biktima sa drug war, apan dili na sila mahimong maapil sa kaso nga crimes against humanity batok kang Duterte nga karon ginadungog sa ICC.
Samtang, wala isalikway ni Conti ang posibilidad nga mahimo gihapon silang maapil sa collective reparation programs sa ICC, sama sa socio-economic ug community projects, nga padayon pang gitan-aw ug gisusi sa mga abogado.