Nagdesisyon na ang mga miyembrong nasud sa International Criminal Court (ICC) nga ipadayon ang disciplinary proceedings batok kang Chief Prosecutor Karim Khan may kalabotan sa mga alegasyon sa sexual assault.
Sa botohan nga gihimo sa usa ka grupo sa mga miyembro sa ICC, 15 ka nasud ang mipabor sa pagpadayon sa proseso, duha ang nag-abstain, ug upat ang misupak, sumala sa mga tinubdan nga wala panganli.
Si Khan, nga nangulo sa imbestigasyon sa mga kaso sa war crimes, crimes against humanity, ug genocide, karon naka-leave of absence samtang gisusi ang alegasyon sa non-consensual sexual interaction sa usa ka abogado sa iyang opisina diin nga hugot niyang gipanghimakak.
Samtang, misamot ang krisis sa ICC tungod sa isyu nga giatubang sa usa sa pinakataas nga opisyal niini, lakip na ang mga silot gikan sa Estados Unidos may kalabotan sa mga aksyon sa korte, sama sa pagpagawas og arrest warrants batok sa pipila ka opisyal sa Israel.
Base sa ulat sa mga imbestigador sa United Nations, adunay “factual basis” o igo nga basihanan ang reklamo sa usa ka babayeng aide batok kang Khan, ug adunay mga testimonya nga nagsuporta sa iyang pahayag.
Bisan pa niini, sumala sa lahi nga pagsusi sa tulo ka hukom, dili pa igo ang ebidensya aron mapamatud-an ang alegasyon “beyond reasonable doubt.”
Matud sa mga abogado ni Khan nga nagkahiusa ang mga hukom sa konklusyon nga walay igo nga basihanan aron mapamatud-an nga adunay misconduct sa iyang katungdanan.
Samtang, nanawagan ang pipila ka African states nga hunongon na ang proceedings, nga giingong nga nahusay na kini ni Khan ang mga alegasyon.
Apan gipili sa ubang mga nasud, lakip ang mga nag-unang nag suporta sa ICC, nga ipadayon ang imbestigasyon.
Ang ICC, nga adunay 125 ka miyembrong nasud, nagsilbing katapusang hukmanan alang sa pag-usig sa pinakabug-at nga krimen sa tibuok kalibutan.