Kumpiyansa ang Deputy Prosecutor sa International Criminal Court (ICC) nga mo-uswag ngadto sa full trial ang kaso nga crimes against humanity batok kang kanhing Pangulong Rodrigo Duterte.
Kini gisulti human sa pagtapos sa upat ka adlaw nga pagdungog alang sa kumpirmasyon sa kaso sa kanhing Pangulo sa ICC Pre-Trial Chamber I.
Sumala kang Deputy Prosecutor Mame Mandiaye Niang, nakapresentar ang ilang kampo og ebidensiya, ug kadaghanan niini may kalabutan sa mga pamahayag mismo sa kanhing Pangulo.
Gipasabot pa niini, nga alang sa kumpirmasyon sa kaso, igo na nga makahatag sila og igo nga basehan aron tuohan ang mga alegasyon, ug dili pa kini ang aktuwal nga paglitis.
Gibarugan usab sa ICC Prosecutor nga adunay igo nga ebidensiya aron tuohan nga makatarunganon ang mga akusasyon batok sa kanhing Pangulo ug dili kini mahuyang nga kaso.
Gipunting ni Niang nga ang kaso kinahanglan ipadayon ngadto sa trial bisan pa sa pagduda sa depensa sa kredibilidad sa mga testigo o sa giingong mga discrepancy sa ilang mga pahayag, nga matod niya dili pa angay tagdon sa mga hukom niini nga hugna.
Gipasabot usab sa Deputy Prosecutor nga wala pa ma-cross examine ang mga testigo, gumikan himuon pa lamang kini sa mismong trial.
Sa laing bahin, sa kampo sa depensa, nauna nang giingon ni defense lawyer Nicholas Kaufman nga nagtuo siya nga ang mga hukom sa ICC Pre-Trial Chamber I magdesisyon base sa ebidensiya.
Gilauman nga ipagawas sa Chamber ang desisyon sulod sa 60 ka adlaw.