Nagdesisyon ang Appeals Chamber sa International Criminal Court (ICC) nga ipa- agi na lamang sa written submissions ang apela ni kanhi Presidente Rodrigo Duterte batok sa iyang detensyon.
Gimandoan ang kampo ni Duterte nga magsumite og appeal brief nga dili molapas sa 20 ka panid hangtod sa Pebrero 5, 2026. Gitugotan usab ang Deputy Prosecutor ug ang mga Legal Representatives sa mga biktima nga magsumite sa ilang mga tubag hangtod sa Pebrero 12, 2026.
Ang maong lakang may kalabutan sa pagkwestyon ni Duterte sa unang desisyon sa Pre-Trial Chamber nga ipadayon ang iyang detensyon. Gidakop si Duterte niadtong Marso 11 pag-abot gikan sa Hong Kong tungod sa imbestigasyon sa ICC sa iyang “war on drugs.” Gidala siya sa The Hague, Netherlands nianang adlawa ug niatubang sa mga huwes pinaagi sa video link niadtong Marso 14.
Kahinumduman nga gibalibaran na sa Pre-Trial Chamber ang hangyo sa kampo ni Duterte alang sa temporaryong kagawasan, samtang gi-postpone ngadto sa laing petsa ang confirmation of charges hearing nga gikatakda unta niadtong Septyembre.