Giuyonan sa Pre-Trial Chamber I sa International Criminal Court (ICC) ang hangyo ni kanhi Presidente Rodrigo Duterte nga dili na personal nga motambong sa iyang tinuig nga detention hearing nga gikatakda karong Biyernes, Pebrero 27.
Sa usa ka waiver nga gipirmahan ni Duterte niadtong Pebrero 23, iyang gipahibalo ang korte nga dili niya gustong mosalmot sa husay, personal man o pinaagi sa video conference. Sumala sa iyang abogado nga si Nicholas Kaufman, nasabtan ni Duterte ang legal nga mga implikasyon sa maong desisyon apan mipili kini nga ang iyang legal team na lang ang morepresentar kaniya.
Kini nga detention hearing gihimo kausa matag tuig aron susihon kung kinahanglan pa ba nga magpabilin sa prisohan ang usa ka akusado samtang wala pa’y pinal nga hukom.
Kahinumduman nga gitugutan usab sa ICC si Duterte nga dili motambong sa upat ka adlaw nga confirmation of charges hearing karong semanaha human siya nangatarungan nga siya “tigulang na, gikapoy, ug maluya.” Nagpabilin usab ang baruganan sa kanhi presidente nga wala siya’y pag-ila sa hurisdiksyon sa ICC.