Gidid-an sa International Criminal Court (ICC) ang hangyo ni kanhi Presidente Rodrigo Duterte nga temporaryo pagpagawas samtang nagpadayon ang paghukom sa mga kaso batok kaniya. Sumala sa Pre-Trial Chamber I sa ICC, gikinahanglan gihapon ang iyang pagpabilin sa prisohan ubos sa mga probisyon sa Rome Statute.
Sa desisyon sa korte, gipasabot nga makatarungan ang pagpabilin sa kustodiya ni Duterte tungod sa kabug-at sa mga akusasyon, ang pagpanginahanglan nga mosalmot siya sa pagdungog sa kaso, ug aron mapugngan ang posibleng panghilabot – sa imbestigasyon o hulga sa mga biktima ug saksi.
Si Duterte anaa sa kustodiya sa ICC sa The Hague sukad pa niadtong Marso 2025, kalabot sa tulo ka kaso sa pagpatay nga giisip nga “crimes against humanity”, may kalabotan sa iyang kontrobersyal nga kampanya kontra ilegal nga droga sa panahon sa iyang pagkapresidente.
Niadtong Hunyo, ang iyang legal team mipasa og petisyon alang sa temporaryong kagawasan, nga naggamit sa mga rason sama sa mahuyang nga kahimsog ug kakulang sa kapasidad sa pag-atubang sa korte. Gipahayag usab sa iyang mga abogado nga wala motutol ang kasamtangang administrasyon sa maong hangyo, apan kini gipanghimakak sa Malacañang.
Ang Office of the Prosecutor sa ICC misupak sa hangyo ug miingon nga kinahanglan pa og mas lawom nga pagsusi sa mga alegasyon bahin sa kahimsog ni Duterte. Samtang, ang Office of Public Counsel for Victims nagpahayag sa kabalaka nga madugay ang hustisya para sa mga pamilya sa mga biktima sa gubat kontra droga.