Nadismaya ang kampo ni kanhing Presidente Rodrigo Roa Duterte human gisalikway sa International Criminal Court (ICC) ang ilang hangyo nga makapresentar og kaugalingong ebidensiyang medikal.
Sumala sa lead counsel nga si Atty. Nicholas Kaufman, napakyas ang hukmanan sa proseso gumikan wala sila tagai og higayon nga kuwestiyunon ang mga report sa eksperto nga gipili sa mga hukom.
Niadtong Enero 26, 2026, nagpagawas ang ICC og desisyon nga nagsulti nga si Duterte “fit to stand trial” base sa pagsusi sa tulo ka independent medical experts.
Ang ruling nag-ugat sa pagsusi nga gihimo niadtong Disyembre 5, 2025, diin gihukman nga adunay kapasidad ang kanhing pangulo nga motambong sa pagdungog.
Tungod niini, gitakda sa ICC ang confirmation of charges hearing sa Pebrero 23, 2026 sa The Hague.
Ang mga kaso nga gihimo batok ni Duterte may kalabotan sa giignong halapad nga paglapas sa tawhanong katungod ilawom sa iyang kampanya batok sa droga.
Samtang, gipunting sa depensa nga magpsaka sila og apela aron iduso ang katungod ni Duterte sa due process.
Nagtuo ang iyang mga abogado nga mahinungdanon nga madungog ang ilang kampo aron masiguro ang patas nga paglitis sa ICC.