Gipasabot sa Malacañang nga dili taktika aron madivert kon mabalhin ang atensyon sa publiko kalabot sa kalambigitan nilang Senador Ronald dela Rosa ug Senador Bong Go nga gikaingong “co-perpetrators” sa kaso ni kanhi Presidente Rodrigo Duterte sa International Criminal Court kon ICC.
Kini ang nahimong tubag ni Palace Press Officer Under Secretary Claire Castro, sa pamahayag sa PDP-Laban nga gigamit matud pa sa administrasyon ang isyu aron mapalayo ang atensyon sa mga pasangil sa korapsyon.
Matud ni Castro, dugay na nga nag-pending ang kaso sa ICC ug napasaka na kini sa wala pa nahimong Presidente si Presidente Ferdinand Marcos Jr.
Matud usab niini, nga wala’y impluwensya ang kasamtangang administrasyon ug gobyerno sa ICC, hinungdan nga dili angayang basulon ang administrasyon sa bisan unsang resulta sa korte.
Gihisgutan usab ni Castro, ang unang pamahayag ni Baguio City Mayor Benjamin Magalong, nga adunay report kalabot sa gikaingong sayop nga mga panghitabo sa kampanya batok sa droga, ug gidasig ang media sa pagpangutana sa mga detalye sa maong taho.