Usa ka makalingaw ug talagsaong eksena ang nakapadani sa atensyon sa mga partisipante ug bisita sa 2025 World Artificial Intelligence Conference (WAIC) nga gipahigayon sa Shanghai niadtong Hulyo 26 hangtod 28.
Gipasiugdahan sa robotics firm nga Unitree, diin gibida ang duha ka humanoid robots nga misalmot sa usa ka one-on-one boxing match atol sa AI Summit niadtong Lunes, Hulyo 28.
Ang mga robot, nga nagsul-ob og headgear sama sa tinuod nga mga boksingero, mipakita sa ilang kahibalo sa mga basic nga boxing moves sama sa jab, hook, ug crossing punches.
Ang robot nga ilang gigamit mao ang G1, usa ka humanoid nga gaan og timbang nga anaa 35 kilos ug adunay gitas-on nga 1.32 ka metros.
Gipakita niini ang impresibong balanse ug kaabtik samtang naglihok sa ring pinasikad sa mando sa ilang mga remote operators.
Ang maong boxing exhibition usa lamang sa daghang mga highlight sa WAIC 2025, diin kapin sa 800 ka mga global tech giants ug mga negosyante ang mipakita sa ilang pinakabag-ong mga inobasyon sa artificial intelligence, robotics, ug automation.
Sa kalibutan nga padulong sa mas intelihente nga kaugmaon, ang maong pasundayag nagpamatuod nga ang AI ug robotics dili lamang teknikal kundi mahimo usab kalingawa ug tingali, mamahimo nga sports entertainment sa umaabot.