Nitaliwan na ang bantugan nga professional wrestler ug aktor nga si Hulk Hogan sa edad nga 71, sumala sa pamahayag sa Clearwater Police Department sa Florida. Matod sa mga otoridad, namatay si Hogan niadtong Huwebes sa buntag tungod sa cardiac arrest.
Gitabang pa kini sa rescue crew apan gideklarang dead on arrival sa balay tambalanan. Si Hogan, nga natawo isip Terry Gene Bollea, nagdako sa Florida ug nailhan sa kalibutan sa wrestling tungod sa iyang pagka-mahigugmaon sa nasud nga karakter.
Misikat kini atol sa 1980s human mapildi ang Iron Sheik ug makuha ang titulo nga World Wrestling Federation (WWF) Heavyweight Champion nga nagsugod sa tinamod nga “Hulkamania.” Bisan pa sa iyang kamatayon, nagpabilin si Hogan isip usa sa labing impluwensyado nga personalidad sa modernong wrestling ug entertainment.