Gikanselar una ni US President Donald Trump ang iyang hulga nga pag-atake sa mga power plant sa Iran human ang giingong “productive” nga panag-istoryahay sa duha ka nasod—usa ka pamahayag nga hugot usab nga gihimakak sa Tehran.
Sumala ni Trump, adunay nahitabong negosasyon tali sa US ug Iran alang sa usa ka “complete and total resolution” sa mga kagubot sa Middle East. Tungod niini, gipahunong una niya ang gihatag nga 48-oras nga deadline niadtong Sabado diin iyang gipasidan-an nga dugmokon ang mga pasilidad sa Iran kon dili ablihan pag-usab ang Strait of Hormuz.
Tungod sa maong anunsyo, daling mibagsak ang presyo sa lana ug gas sa merkado sa tibuok kalibutan. Sa wala pa kini, nagka-istorya usab si Trump ug UK Prime Minister Keir Starmer diin ilang gipaniguro nga ang pag-abli sa maong kipot importante kaayo alang sa pagbalik sa normal sa global shipping.
Apan luyo sa mga sulti ni Trump, usa ka wala nganli nga tinubdan gikan sa Iranian news agency ang miingon nga walay kamatuoran ang giingong direktang panag-istoryahay tali ni Trump ug sa Tehran.