Gipalig-on sa Road and Traffic Administration (RTA) ang kampanya batok sa mga “bora-bora” o modified nga motorsiklo sa siyudad, human midaghan ang reklamo sa kasaba ilabina karong duol na ang Kapaskuhan.
Sa pakighinabi sa Bombo Radyo Malaybalay kay Ernie B. Neri, Traffic Operation Officer 1 sa RTA,na matod pa, sakop sa City Ordinance No. 900 ang pagdili sa kusog ug samok nga muffler, nga adunay silot nga ₱3,000 sa unang paglapas.
Karong semanaha, duha ka yunit sa “bora-bora” ang nadakpan sa mga checkpoint ug operasyon sa lain-laing dapit sa siyudad.
Samtang nagkadaghan ang lihok sa katawhan sa panahon sa Pasko, gipahibalo sa RTA nga full force ang ilang traffic personnel human gi-redeploy ang mga enforcer gikan sa eskwelahan ngadto sa traffic management.
Giawhag usab ni Neri ang publiko nga mo-report dayon sa ilang opisina o hotline kon makasugat og “bora-bora” aron dali nga matubag ang problema ug mapadayon ang kahapsay sa komunidad.