Gipahayag ni Senadora Risa Hontiveros nga abri siya sa posibilidad nga modagan isip presidente sa umaabot nga 2028 elections, apan kini mahitabo lamang kung siya ang pilion nga mahimong “standard bearer” sa tibuok grupo sa opisisyon (opposition bloc).
Matud pa sa senadora, wala siya nagabalibad sa maong hagit ug andam siya sa bisan unsang posibilidad alang sa kaayohan sa nasud. Hinuon, gipasabot ni Hontiveros nga ang iyang prayoridad sa pagkakaron mao ang paghiusa sa nagkalain-laing grupo sa opisisyon aron makamugna og lig-on nga lineup alang sa sunod nga eleksyon.
Dugang pa niya, importante ang pagbaton og lig-on nga alternatibo alang sa mga Pilipino ug padayon ang iyang pakig-alayon sa mga kaubang lider aron mapalig-on ang ilang hanay sa dili pa moabot ang 2028.