Gikonsiderar ni Gilas Pilipinas head coach Tim Cone nga usa ka dakong dungog ug dugang kusog alang sa national team ang suporta sa mga Pinoy fans nga motan-aw sa ikaduhang window sa FIBA World Cup Asian Qualifiers.
Sumala ni Coach Tim Cone, dako kaayo og matabang kanila ang init nga suporta sa mga dumadapig ilabi na nga duwaon kini sa home court. Karong Huwebes, gikatakdang sangkaon sa Gilas ang lig-ong team sa New Zealand, samtang sa umaabot nga Marso 1, makatigi nila ang Australia alang sa pag-abri sa Group A.
Malaumon si Cone nga sa iyang kasamtangang line-up, makahimo sila sa pagpakig-atbang sa mga dagko ug tag-as nga players sa New Zealand ug Australia.
Matud pa niya, ang pagdula sa atubangan sa “home crowd” naghatag og garbo ug kadasig sa mga magdudula nga panalipdan ang ilang kaugalingong teritoryo.