Dili angay kahadlokan ang mga kaso sa HIV nga natala sa probinsya sa Bukidnon. Sa eksklusibong pakighinabi sa Bombo Radyo Malaybalay kay Joseph Marben Gealon, Provincial HIV Coordinator nga ang mga kumpirmadong kaso nga natala sa Bukidnon dili gyud nagikan sa mismong nga lungsod o syudad sa probinsya tungod kay kasagaran niini anaa sa mga highly urbanized cities.
Saysay pa ni Gealon, base sa patakaran sa Department of Health ang pag-ihap sa kaso mag-agad sa permanent address sa pasyente busa bisan pa nga ang uban niini nagtrabaho o nagpuyo sa ubang lugar, sa Bukidnon kini maihap.
Gipahayag usab ni Gealon nga kontrolado na ang sitwasyon ug anaa na sa proseso sa pagpanambal ang mga pasyenteng nagpositibo sa HIV. Dugang pa niini, usa sa mga hagit karon mao ang kahadlok sa ubang indibidwal nga magpatest tungod sa posibilidad nga ma-discriminate sila sa ilang mga higala ug pamilya.
Tungod niini, giawhag ni Gealon ang publiko nga dili magpadala sa kaulaw sa pagpapatest ug dili usab magpakita og diskriminasyon batok sa mga taong adunay HIV gani angay kining suportahan ug tabangan sila aron magpadayon sa maayong pagpalig on sa panglawas ug kinabuhi.
Kasamtangan, adunay HIV treatment hubs sa probinsya nga anaa sa Bukidnon Provincial Medical Center sa Malaybalay City, BPH sa Maramag, ug City Health Office sa Valencia City.