Gikumpirma sa Sydney Water ang pagkadiskubre sa usa ka dako kaayong “fatberg”nga gibana-banang susama kadako sa upat ka bus nga anaa sa lawom ug lisod maabot nga parte sa Malabar Wastewater Treatment Plant.
Ang maong fatberg gilangkuban sa nagpundok nga mantika, lana ug grasa, gituohang mao ang tinubdan sa mga misteryosong “itom nga bola” nga nagsugod og kabanlas sa mga baybayon sa Sydney sukad pa niadtong 2024.
Sa unang imbestigasyon, nagtoo ang mga otoridad nga ang maong mga bola mga “tar” gikan sa oil spill. Apan human sa gihimong pagsusi sa University of New South Wales (UNSW), nasuta nga duna kini sagol nga hugaw sa tawo.
Sumala ni Sydney Water Managing Director Darren Cleary, ang maong bara nahimutang sa usa ka “inaccessible dead zone” sa tunnel nga delikado ug dili luwas nga sudlan sa mga trabahante.
Giklaro sa mga eksperto nga ang mga bolang nabanlas sa baybayon mamugna kon ang agas sa tubig muagi ibabaw sa fatberg, hinungdan nga dunay gagmayng bahin niini nga mapisik ug maporma nga lingin hangtod nga maanod sa dagat.