Gipaniguro sa Hanabana Construction and Equipment Corporation nga aduna kini igong kapasidad sa pagdumala sa suplay sa panubig sa syudad sa Malaybalay.
Sa eksklusibong pakighinabi sa Bombo Radyo Malaybalay kang Ramonito Sagocsoc, Bise-Presidente sa Hanabana Construction and Equipment Corporation, gipadayag niini nga hangtod karon wala pa’y nadawat nga pormal nga tubag ang buhatan gikan sa PrimeWater mahitungod sa gisugyot nga partnership diin ang Hanabana mahimong bulk water supplier.
Sumala pa kang Sagocsoc, mitumaw kini nunot sa desisyon sa Malaybalay City Water District nga tapuson ang kontrata niini sa PrimeWater human mapaso ang 90 ka adlaw nga extension nga gihatag, ug giila na karon ang maong kasabutan nga “terminated in principle.”
Tungod niini, mipasiugda ang Hanabana nga andam kini mosulod ug molihok isip alternatibong water service provider aron masiguro ang kasaligan nga suplay sa tubig sa syudad ug malaomang masugdan ang konstraksyon sunod tuig.
Gibutyag niini nga mipasa na ang Hanabana og resolusyon sa lokal nga kagamhanan sa syudad sa Malaybalay aron matugotan nga makapag-operate kini sa Level III water system operation.
Matud pa niini, direkta nga maserbisyohan ang mga kabalayan pinaagi sa P150 milyon hangtod P200 milyon nga investment alang sa tulo ka barangay partikular ang Barngay Patpat, Sumpong ug Kalasungay.
Lakip sa plano sa kompanya ang pagtukod og modernong pasilidad sa potable water aron masiguro nga limpyo, luwas, ug mainom ang tubig nga ihatag sa katawhan.