Gikalingawan karon sa internet ang duha ka binuhing iro sa Poland tungod sa ilang klaro kaayong “guilty look” human masakpi sa ilang amo.
Sa video nga nag-viral, makita ang duha ka iro nga si Fenka ug Baster nga imbes modagan o mopaak, nagpabilin hinuon kini sa ilang nahimutangan samtang nagpaso-paso ang ilang amo sa lawak nga puno sa kalat nga ilang gihimo.
Si Fenka, ang mas gamay nga iro, makit-an nga nagduko ug hinay-hinay nga naglikay-likay sa iyang panan-aw sa camera, samtang si Baster daw “nag-freeze” sa tumang kauwaw ug dili usab makatan-aw og diretso sa iyang amo.
Daghang mga netizens ang nalingaw sa maong talan-awon tungod muarag tawo nga ekspresyon sa mga iro, diin makita ang ilang pagsulay sa “pagpakaluoy” sa ilang tag-iya pinaagi sa makahimuot nga hitsura.
Bisan pa man og gitawag kini og “guilty look” sa mga tawo, ang mga animal behaviorists nagkanayon nga kini usa ka matang sa “appeasement behavior”.
Gihimo kini sa mga iro aron mamenosan ang kasuko sa ilang amo o aron ipakita nga dili sila usa ka hulga, bisan pa man og wala sila’y bug-os nga pagsabot sa konsepto sa moral nga kasaypanan.