Nameligro na karon nga hingpit nga matagak gikan sa Play-In Tournament picture ang Golden State Warriors (GSW) human sila makatilaw og laing kapildihan sa kamot sa Detroit Pistons, ang top team sa Eastern Conference.
Nakuha sa Pistons ang kadaugan sa iskor nga 115-101 batok sa GSW, bisan pa man sa kakuwang sa ilang star player nga si Cade Cunningham. Napakyas ang Warriors sa pagbawi tungod sa grabeng opensa sa Pistons, ilabi na nga nahimong “ice cold” o dili epektibo ang ilang defensive anchor nga si Draymond Green.
Sulod sa 22 minutos ni Green sa hardcourt, kaduha lamang kini misulay sa pagpasulod og field goal apan parehong sipyat. Nakatampo lamang siya og 5 rebounds, 6 assists, usa ka steal, ug usa ka block sa maong kapildihan sa 2022 NBA champion.
Sa pikas bahin, gipangunahan sa bagitong sentro sa Detroit nga si Jalen Duren ang ilang kadaugan. Mikamada si Duren og 23 puntos gikan sa walo ka field goals ug pito ka free throws.
Sa pagkakaron, gunit sa Warriors ang ika-napulo (10th) nga pwesto sa Western Conference—ang pinaka-ulahing spot alang sa Play-In Tournament—sa dili pa magsugod ang Playoffs sa hinapos nga bahin sa Abril.