Usa sa pinakadakong hagit nga giatubang sa Pilipinas mao ang epekto sa global warming nga nagrsulta sa daghang bagyo, dili regular nga pag init ug pag ulan diin nagresulta sa mga kalamidad.
Sa eksklusibong pakighinabi sa Bombo Radyo kay Dr. Jessie G. Suson, City Environment and Natural Resources Officer sa Cenro Malaybalay,nga tungod sa pag init sa kalibutan, apektado ang tanan gikan sa kinaiyahan hangtod sa pang uma.
Matod pa ni Dr. Suson, usa sa labing apektadong sektor mao ang food security tungod sa dili na kasaligan nga panahon. Ang mga mag-uuma karon naglisod sa pagpananom kay wala na masubay ang regular nga ting-ulan ug ting-init, hinungdan nga dili maayong motubo ang mga tanom.
Gipunto usab ni Dr. Suson nga usa sa mga paagi aron mapugngan ang epekto sa global warming mao ang pagpananom ug kahoy. Gipasabot niini nga sa pagkakaron, adunay 18 ka ektarya sa dakbayan sa Malaybalay nga walay kahoy ug kini usa ka kabalaka alang sa Cenro.
Tungod niini, giaghat ni Dr. Suson ang mga residente nga magtanom ug kahoy, diin libre ang mga seedlings nga ipanghatag sa lokal nga kagamhanan. Gipasabot sa Cenro nga ang pagtanom ug kahoy dili lamang proteksyon batok sa kalamidad apan usa usab ka kontribusyon sa pagpakunhod sa kainit sa kalibutan ug pagpanalipod sa umaabot nga henerasyon.