Gihisgutan ni Alan Comiso, Chief sa City Disaster Risk Reduction and Management Office (CDRRMO) ang kabahin sa Executive Order no. 22 sa Department of Education (DepED) nga mao ang mga giya ug sumbanan sa pagsuspenso sa klase panahon sa emerhensiya atol sa gipahigayon nga Kapihan Quarterly Media furom.
Tumong niini aron mahatagan og saktong impormasyon ang mga ginikanan, magtutudlo, ug mga tinun-an aron malikayan ang kalibog sa higayon nga adunay dautang panahon.
Giklaro usab niini ang awtomatikong guidelines sa pagsuspinde sa klase base sa Executive Order No. 66.
Matud pa niini, dili na kinahanglan maghulat pa og advisory gikan sa lokal nga kagamhanan kung aduna nay gipagawas nga signal warning ang PAGASA.
Gibasabot ni Comiso nga gawas sa awtomatikong pagsuspinde sa klase base sa signal sa PAGASA, ang mga school principal ug supervisors adunay awtoridad sa pagdesisyon kung adunay weather disturbance.
Base sa Executive Order No. 22, ang mga namuno sa matag eskwelahan sa adunay gahom sa pag-deklarar og “no class” kung makita nila nga adunay peligro tungod sa dautang panahon sa ilang dapit.