Gisugdan na ang pagpanghatag sa mga backlog nga plaka sa motorsiklo sa Region 10 nga naglakip sa mga tuig 2014 hangtod 2020, human kini maabot sa rehiyon niadtong miaging mga adlaw. Mikabat kini sa kapin 294,000 ka plaka nga kasamtangang gipang-apod-apod sa mga tag-iya sa tibuok Northern Mindanao.
Sa pakighinabi sa Bombo Radyo Malaybalay, gibutyag ni Regional Director Nelson S. Manaloto sa Land Transportation Office (LTO) Region 10 nga padayon ang ilang paningkamot uban sa mga local LTO offices aron mapadali ang distribusyon sa maong mga plaka.
Gipasabot usab sa direktor nga nagpadayon ang koordinasyon tali sa regional office ug mga stakeholders aron masiguro nga dali ug hapsay ang paghatud sa mga plaka ngadto sa mga benepisyaryo.
Gilauman nga pinaagi sa maong inisyatibo, masolusyonan na ang dugay nang problema sa kakulangan sa plaka ug mas mapaayo ang serbisyo sa publiko.