Gisurrender na sa mga kanhing myembro sa New People’s Army (NPA) ang mga armas nga gilubong sa Barangay Bontongon, Impasugong, Bukidnon.
Sa eksklusibong pakighinabi sa Bombo Radyo Malaybalay kang alias “Dragon” kanhi myembro sa walhong grupo, gibutyag niini nga ang mga armas giputos sa trapal, sako, ug cellophane aron dili makutkot sa mga mananap o makit-an sa mga sibilyan ug gikuha ug gihatag sa mga kanhing rebelde ngadto sa mga otoridad isip timaan sa ilang tinuoray nga pagbalik sa sabakan sa gobyerno ug tinguha nga makab-ot ang kalinaw.
Wala pa usab matino kung asa gikan nga partikular nga sektor o yunit sa NPA ang mga armas.
Ang maong pagsurender ug turnover sa armas gipahigayon atol sa 64th Aldaw sa Barangay Bontongon ubos sa programa nga Hatod Serbisyo nga gipahigayon sa Barangay Covered Court sa maong lugar.
Samtang sa laing bahin, gikasubo usab ni Mayor Jetaime “Mai-Mai” Okinlay Gumban, nga sa sulod sa onse ka tuig, wala matud pa naabtan og Hatod Serbisyo ang Barangay Bontongon, ug gikalipay nga ning kasamtangan nalakip na kini sa naabtan sa mga hinabang sa kasamtangan administrasyon.
Gibutyag usab sa Mayor, nga adunay P200 milyon nga pondo alang sa road opening gikan sa Camp 44 padulong sa sentrong bahin, P1.3 milyon alang sa road maintenance, ug P500,000 alang sa proyekto sa patubig hangtud sa Disyembre 2025.
Samtang sa tuig 2026, adunay usab dugang nga P1 milyon alang sa patubig ug pondo usab nga gigahin para sa laing Road and Bridges Project.