Nagpadala og pormal nga pahimangno ang Malaybalay City Water District ngadto sa PrimeWater tungod sa kapakyasang pagtuman sa mga kondisyon sa ilang joint venture, nga dugay nang naghatag og kalisod sa serbisyo sa tubig sa syudad.
Sa kasamtangang pagtan-aw sa isyu, nangayo og kopya sa summary report ang konseho pinaagi sa Committee as a Whole aron klaro ang mga problema nga giatubang sa partnership. Nasuta nga daghan ang kakulian—gikan sa proyekto nga wala matuman hangtod sa kalidad sa serbisyo nga nagpabiling ubos. Gihangyo sa otoridad nga ihatag ang 60 ka adlaw nga deadline nga gisulti na sa notice, nga dili na mahimong i-extend.
Sa laing bahin gipasabot sab sa konsehal nga sukad pa sa 2019, anaa na kini nga mga problema, apan naluya ang tubag tungod sa isyu sa pondo. Gusto unta mangutang ang water district sa Landbank, aron ilisdan ang daan nga tubo ug mapakunhod ang non-revenue water (NRW), apan napakyas ang loan application tungod sa taas nga NRW rate.
Naglaum ang konseho nga pinaagi sa klarong deadline ug tukmang aksyon, masulbad na ang dugay nga krisis sa tubig nga nakaapekto sa daghang residente sa Malaybalay.