Wala makasugakod ang Gilas Pilipinas Women batok sa host nation nga France human sila tinambakan sa score nga 115-66 sa pagsugod sa ilang kampanya sa FIBA Women’s World Cup 2026 Qualifying Tournament kaniadtong Huwebes (oras sa Pilipinas).
Bisan pa sa paningkamot sa mga Pinay ballers, namintaha gyud ang gidak-on ug kusog sa French team, nga kasamtangang World No. 3 ug silver medalist sa miaging Olympics. Sayong nakabuylo ang France ug nilabaw og dako hangtod nga niabot sa 51 puntos ang ilang labaw sa dula.
Nangulo sa Gilas si Sumayah Sugapong nga mitala og 13 puntos, samtang nidugang si Afril Bernardino og 12 puntos ug 6 rebounds. Mitampo usab ang UAAP MVP nga si Kacey Dela Rosa og 11 puntos.
Sa bahin sa France, gipakita sa WNBA prospect nga si Dominique Malonga ang iyang dominasyon human siya miposa og 21 puntos ug 9 rebounds.
Bisan pa sa kapildihan, dako gihapon kini nga dungog alang sa Gilas Women tungod kay kini ang unang higayon nga nakasangka sila sa mga elite teams sa tibuok kalibutan. Ang Gilas Pilipinas gikatakdang makasangka sunod sa Germany karong Biyernes, Marso 13.