Gisiguro ni Gilas Pilipinas coach Tim Cone, nga mahimong init ang ilang exhibition game batok sa nasud nga Jordan sa dili pa sila makigsangka sa FIBA Asia Cup nga ipahigayon sa Saudi Arabia.
Matud ni Cone, nga karong Agosto 2 mao na ang ilang mahimong kataposan dula sa dili pa magsugod ang FIBA Asia Cup sa umaabot Agosto 5.
Katapusan nilang nakasangka ang Jordan sa gold medal match sa 19th Asian Games nga gipahigayon sa Hangzhou, China, diin midaog ang Pilipinas, sa score nga 70-60.
Pahimuslan usab sa Gilas Pilipinas ang higayon nga dili magdula ang kanhi NBA player ug PBA import nga si Rondae Hollis-Jefferson.
Taliwala nga nalista si Hollis-Jefferson sa final 12 sa Jordan, dili matud pa kini apil sa ilang exhibition game.
Ang Jordan anaa sa Group C kauban ang China, India ug Saudi Arabia samtang ang Gilas Pilipinas anaa sa Group D kauban ang New Zealand, Chinese Taipei ug Iraq.