Gipunting ni Cagayan de Oro Representative Rufus Rodriguez nga nahimong usa lamang ka “fishing expedition” ang paglakip sa giingong unexplained wealth ni Vice President Sara Duterte isip basehan sa ika-upat nga impeachment complaint.
Sumala ni Rodriguez, kulang og detalye ang mga alegasyon nga may kalabutan sa Statements of Assets, Liabilities, and Net Worth o SALN sa Bise Presidente gumikan wala kini’y lakip nga attachments o klarong ebidensya nga magpakita kung asa nga bank accounts adunay giingong pagtaas sa kantidad samtang siya Kalihim sa Department of Education ug Bise Presidente.
Gibarugan ni Rodriguez nga wala’y “sufficiency in substance” ang maong ground.
Sa laing bahin, gibarugan ni Representative Paolo Ortega, nga usa sa mga nag-endorso sa ika-upat nga impeachment complaint batok kang Sara Duterte, nga adunay mga properties ang Bise Presidente nga dili tukma sa iyang kabtangan.
Matud pa ni Ortega, pipila sa maong mga kabtangan wala usab mahisulat o maapil sa mga detalye nga anaa sa Statement of Assets, Liabilities, and Net Worth (SALN) ni Bise Presidente Duterte.
Dugang pa niini, nga adunay klarong discrepancies sa inflow ug pagbalhin sa pondo nga wala’y katugbang nga ligal nga kita o deklarasyon sa mga regalo, nga mahimong maghatag og rasonableng pagduda nga gikan kini sa dili legal nga tinubdan.
Gipangutana ni Rodriguez kung unsang espesipikong bank account ang gipasabot, apan gipahinumdum si Gerville Luistro, chair sa House Justice Committee, ang Bank Secrecy Law nga nagdumili sa pagbutyag sa detalye sa bank accounts gawas kon adunay otorisasyon sa korte o tukmang ahensya.
Sumala ni Luistro, ang impeachment proceeding maoy usa sa legal nga paagi aron masusi pa ang maong mga dokumento kon mopadayon ang kaso.