Sa pagbalik sa imbestigasyon sa Senate Blue Ribbon Committee bahin sa mga anomaliya sa flood control karong Enero 19, unang pagahisgotan ang giingong “recantation” o pagbawi sa testimonya sa mga kanhi engineers sa DPWH Bulacan nga sila si Henry Alcantara ug Bryce Hernandez.
Matod ni Committee Chairman Senator Ping Lacson, wala pa silay nadawat nga pormal nga pahibalo gikan sa Department of Justice (DOJ) bahin niining giingong pagbawi sa duha ka engineer. Gipahimangnoan ni Lacson ang mga engineer nga kung tinuod man nga mobawi sila sa ilang mga gisulti ubos sa panumpa, mahimo silang manubag sa balaod tungod sa paglapas sa perjury.
Bisan pa man niini, masaligon ang senador nga dili mabungkag ang kaso tungod kay duna silay gihuptang mga lig-on nga ebidensya ug “money trail” gikan sa mga budget books nga nagpamatuod sa mga kickback sa flood control projects.
Gawas niini, magpagawas usab og subpoena ang komite batok sa pipila ka opisyal nga wala nitambong sa miaging hearing, lakip na silang kanhi DPWH Secretary Manuel Bonoan ug kanhi Congressman Zaldy Co.
Giimbitahan usab si Representative Leandro Leviste aron ipakita ang “Cabral files” nga nagbutyag sa mga pundo nga moabot og P5 bilyon kada tuig nga giingong napaingon sa pipila ka mga opisyal.