Patay ang giingong kabit samtang samaran ang asawa human sila gidunggab sa bana sa Purok 3, Barangay Poblacion, Cabanglasan, Bukidnon, pasado alas 11 sa gabii, sa milabayng adlaw, diin selos ang gilantaw nga motibo sa krimen.
Sumala ni Police Captain Linomer Casseres, Officer In Charge sa Cabanglasan MPS, daling niresponde ang kapulisan human nadawat ang report ug didto ilang nakit-an ang duha ka biktima nga puno sa dinunggaban ug daling gidala sa balay tambalanan. Ang lalaking biktima nga nailhan sa alyas “Cardo,” gideklarang dead on arrival, samtang ang asawa sa suspek nga si alyas “Anna,” nakaangkon og samad sa kamot samtang ningsulay sa pagpugong sa iyang bana.
Sa inisyal nga imbestigasyon, nasayran nga daan nang adunay panagbangi ug selos ang suspek ngadto sa biktima. Sa gabii sa insidente, giingong nasakpan sa suspek ang iyang asawa nga kauban ang biktima, hinungdan nga iyang gigukod ang lalaki ug gidunggab sa ulo ug dughan nga maoy hinungdan sa iyang hinanaling kamatayon.
Nasayran usab nga duna nay naunang settlement o panagsabot sa barangay ang duha ka kampo tungod sa susamang isyu, nga nagpakita sa dugay nang tensyon tali kanila.
Boluntaryong nitahan ang suspek sa kapulisan ug karon anaa na sa kustodiya sa Cabanglasan MPS samtang giandam na ang pagpasaka og kasong kriminal batok kaniya.