Misaka na ngadto sa 64 ang kompirmadong patay sa paglubog sa barkong M/V Trisha Kerstin 3 human nakarekober ang Philippine Coast Guard (PCG) og duha pa ka mga lawas niadtong Miyerkules, Pebrero 18.
Sa pagkakaron, nagpabilin sa 293 ang ihap sa mga naluwas, samtang duna pa’y 15 ka mga tawo nga gikatahong missing. Ang maong trahedya nahitabo kaniadtong Enero 26 sa kadagatan sa Basilan samtang naglawig ang barko gikan sa Zamboanga City paingon sa Jolo, Sulu.
Sumala sa Department of Transportation (DOTr), usa sa gilantaw nga rason sa pagkalunod mao ang overloading o pagpasobra sa karga ug pasahero. Tungod niini, nag-atubang na og mga administratibong kaso ang tag-iya sa barko nga Aleson Shipping Lines aron kanselahon ang ilang prangkisa o Certificate of Public Convenience (CPC).