Nag-atubang og kasong kriminal si Criminal Investigation and Detection Group Director Maj. Gen. Nicolas Torre III lakip na ang 9 ka mga opisyal sa CIDG.
Ang maong reklamo nag-ugat sa dihang nagreklamo ang usa ka babayeng negosyante human kining gidetain sulod sa 6 ka adlaw subay sa kopya sa red notice gikan sa International Police Organization (Interpol).
Nasayran sab nga napakyas si Torre ug ang mga kaubanan niini sa pagtambong sa preliminary investigation nga gipahigyon niadtong Abril 21 ug 28 ning tuiga.
Saysay sa reklamante nga giilang si Rotchelle Calle, 48 anyos nga iligal kining giaresto ug gipriso nila Torre ug sa mga kaubanan niini niadtong Nobyembre 21 hangtod 28 tuig 2024 human nga nagpaguwa matud pa og red notice ang Interpol batok kaniya niadtong May 2 tuig 2023.
Ang maong notice nag-ugat sa dihang gireklamo kini sa iyang kanhing business partner nga giilang si Abdulmalek Alshihhim gumikan sa ‘fraud’ ngadto na sa United Arab Emirates.
Sa kopya sa complaint ni Calle, nasayrang 4 ka mga opisyal sa CIDG Detective and Special Operations Unit ang miadto sa iyang panimalay aron isilbi ang red notice gikan sa interpol niadtong Nobyembre 19,2024.
Aron matud pa nga di kini arestuhon, hatagan na lamang matud pa niini ang mga nahisgutan og regalo sa pasko isip paconsuelo, apan nagdumili kini.
Milabay ang 2 kaadlaw, 7 na matud pa ka mga sakop sa CIDG ang miaresto kaniya sa Makati City Hall.
Human kining giaresto, gipriso kini sa CIDG headquarters rason ug nakasinati og di maayong pagtratar rason nga nangayo kini og tabang gikan sa Public Attorney’s Office (PAO).
Human ang 6 kaadlaw, gimanduan sa PAO Quezon City Division si Torre nga buhian si Calle gumikan gikinahanglan matud pa kining silbihan og court order o warrant of arrest gikan sa otoridad sa Pilipinas ug sa UAE nga dunay petsa nga Nobyembre 26 ning tuiga.
Usa ka adlaw ang milabay, gilayong midangop si Calle sa Department of Justice aron magpasaka og kasong perjury batok kang Alshihhi, apan giingnan matud pa kini sa piskalya nga ‘incomplete’ ang nahim niining reklamo.
Gani, ayha pa man kini gibuhian, gipapirma pa kini og ‘affidavit’nga nagkanayong misurender kini sa kapulisan, sukwahi sa pugsanong pagdakop ug pagpriso kaniya.