Giinsistir sa abogado ni kanhi Pangulong Rodrigo Duterte, si Atty. Nicholas Kaufman, nga walay partikular nga direktiba gikan sa kanhi Presidente aron patyon ang mga drug suspect sa tunga sa kampanya batok sa iligal nga droga.
Gibuhat ni Kaufman ang maong pahayag sa padayon nga confirmation of charges hearing batok sa kanhi Presidente niadtong Huwebes, Pebrero 26, diin siya nag-atubang sa kaso nga crimes against humanity tungod sa mga pagpatay sa anti-drugs campaign sa panahon nga siya ang alkalde sa Davao City ug Presidente sa Pilipinas.
Sumala kang Kaufman, walay smoking gun o lig-on nga ebidensya sa kaso ug walay bisan usa ka testigo nga nag-ingon nga nakadawat og direktang sugo gikan kang Duterte nga mogawas ug mupatay sa mga drug personalities.
Gibatikos usab ni Kaufman ang alegasyon sa prosekusyon nga daw gihimo ni Duterte ang pag-atake sa tibuok populasyon sa Pilipinas base sa polisiya aron ma-neutralize ang mga tawo nga gituhuan nga nalambigit sa krimen.
Gituohan usab ni Kaufman nga ang gidaghanon sa namatay sa anti-drug operations gamay ra kung itandi sa kadaghan sa naaresto ug sa mga operasyon nga gihimo sa state forces.
Gibalikan ni Kaufman ang datos nga gipakita sa ICC Prosecution gikan sa Philippine Drug Enforcement Agency (PDEA) nga adunay 5,281 ka drug personalities nga napatay sa anti-drug operations sa unang duha ug tunga ka tuig sa pagkapresidente ni Duterte.
Apan, gipakita usab ni Kaufman ang usa ka chart nga nagpakita nga gikan sa Hulyo 2016 hangtod Pebrero 29, 97% sa drug personalities naaresto sa anti-drug operations samtang 3% ra ang napatay.