Nagmalampuson ang pares gikan sa Finland nga si Teemu Touvinen ug Jatta Leinonen sa gipahigayon nga Wife Carrying Race didto sa Dorking, Surrey, U.K.
Nakab-ot sa duo ang kadaugan sulod lang sa 1 ka minuto ug 45 ka segundo sa 380-metrong kurso nga puno sa tungason ug lugsongon.
Nagsunod kanila ang British pair nga si Edward Nash ug Kathryn Knight, kinsa maoy morepresentar sa U.K. alang sa World Championships sa Finland karong Hulyo.
Ang kompetisyon giisip na nga usa ka lingaw-lingaw nga paugnat sa kusog diin gitugotan ang pagsul-ob og mga costume.
Ubos sa balaod sa lumba, ang gipas-an kinahanglan nga dili moubos sa 50 kilos; kung gaan ang pares, obligadong magdala og rucksack nga puno sa harina o tubig aron makompleto ang gikinahanglang timbang.