Gilusad sa Food and Drug Administration (FDA) ang mas gipaayo nga verification portal aron mahatagan og kahigayonan ang mga mamalitay nga daling masusi kung rehistrado, lisensyado, ug luwas ba nga gamiton ang mga produkto nga ginabaligya sa merkado.
Pinaagi sa maong portal, mahimo usab nga tan-awon sa publiko ang registration status sa mga pagkaon, tambal, kosmetiks ug uban pang mga regulated products, lakip na ang mga establisimento diin kini ginabaligya.
Gipasigarbo sa portal ang mas gipasimple nga search box nga mudawat og mga keyword, ngalan sa produkto, registration numbers, ngalan sa kompanya ug bisan pa ang voice searches.
Matud ni FDA Spokesperson Khay Ann Magundayao-Borlado, ang portal mahimong ma-access sa verification.fda.gov.ph o pinaagi sa opisyal nga website sa FDA.
Dugang pa nga pinaagi niini nga lakang, mas mapalig-on ang proteksyon sa mga konsumidor tungod kay masiguro nga niagi sa saktong proseso ug luwas gamiton ang mga produkto nga ilang gipalit.