Nakamugna ang usa ka estudyante gikan sa Glasgow School of Art sa Scotland og pinakadakong sock monkey sculpture sa tibuok kalibutan gamit ang hapit 200 feet nga corduroy fabric.
Si Emilia Evans-Munton, 22 anyos, nagsugod sa proyekto isip kabahin sa iyang degree show.
Wala niya damha nga mahimo kining world record hangtod gipunting sa iyang amahan nga posible kini na ang pinakadako sa kalibutan.
Tungod niini, nakigkontak siya sa Guinness World Records.
Ang higanteng sock monkey adunay gitas-on nga 49 feet, 6 ka pulgada ug gipuno kini og 40 ka bale sa dayami.
Aduna kini’y dagkong butones nga mata nga hinimo gikan sa recycled scaffolding wood, ug matag usa adunay lapad nga 1.5 metros (5 ka talampakan).
Gipakita kini sa publiko sa Field Maneuvers Festival sa Norfolk, England, diin gi-awhag ang mga bisita nga makig-interact sa higanteng dulaan.
Sumala kang Evans-Munton, tumong sa iyang sining o art nga ipabati sa mga hamtong ang pagbati nga mura sila’g gagmay pag-usab atubangan sa usa ka dako kaayong butang, aron mabuhi pag-usab ang ilang pagkabata ug kahinam sa mga dulaan.
Sa pagkakaron, gitangtang na ang sulod o stuffing sa sock monkey ug kini gitago na sa attic sa iyang lola.