Naluwas ang mukabat sa 50 ka mga pasahero ug lima ka crew human nahagsa ang usa ka eroplano sa kadagatan sa Somalia.
Base sa inisyal nga imbestigasyon, nakaangkon og technical problem ang maong eroplano sa Starsky Aviation, usa ka Fokker 50 plane, pipila lang ka minuto human kini ni-take off gikan sa Mogadishu International Airport.
Dugang pa sa Civil Aviation Authority (CAA) sa Somalia, nihangyo ang piloto nga mubalik sa airport tungod sa maong problema, apan napakyas kini sa paghunong sa runway. Ni-overshoot ang eroplano sa tarmac hangtod nga hingpit kining nahagsa sa mabaw nga bahin sa dagat.
Luwas nga nakagawas ang tanang pasahero gikan sa eroplano human kini nakalapag sa Indian Ocean.
Gidayeg usab nila ang paspas ug kalmado nga pagdesisyon sa piloto aron maseguro ang kaluwasan sa tanan.
Kasamtangan, nagpadayon pa ang gihimong imbestigasyon sa mga awtoridad mahitungod sa maong insidente.