Gipaambit sa Miss Grand International 2025 nga si Emma Tiglao ang dili maayong kasinatian sa usa ka seafood restaurant human matod pa nakasinati og pambastos gikan sa usa ka waiter tungod lang sa nabaylo nga order.
Pinaagi sa usa ka Facebook post niadtong Sabado, Marso 14, gibutyag ni Emma nga nangaon kini kauban sa pamilya ug nag-order og mga seafood bundle nga adunay chili garlic, Cajun, ug butter garlic sauce.
Apan sa dihang giserve na ang pagkaon, namatikdan niini nga wala ang chili garlic sauce nga ilang gipangayo.
Matod sa beauty queen, gipahibalo nila ang staff bahin sa sayop, apan giingnan kini nga dili na kini mahimong ilisdan tungod kay luto na ang pagkaon.
Tungod niini, nihangyo na lang sila kon mahimo ba nga mangayo og gamay nga chili garlic sauce sa kilid.
Bisan pa niini, wala malikayi ni Emma ang pagkadismaya sa giingong paagi sa pagtubag ug pagtagad sa maong waiter ngadto kanila.