Giangkon ni Emman Bacosa Pacquiao nga ang iyang nag-unang tumong mao ang mahimong usa ka boxing world champion ug magsilbing inspirasyon sa mga kabataang Pilipino.
Sa usa ka interview, giingon ni Eman nga gusto niyang makab-ot ang kalampusan pinaagi sa kakugi ug dedikasyon.
Bisan pa man og nagsugod na siya sa pagsulod sa kalibutan sa endorsements ug showbiz, gilinaw sa batan-ong boksidor nga nagpabilin nga prayoridad ang iyang karera sa professional boxing.
“Ang akong prayoridad karon mao ang professional boxing… kining sa show business, kon wala koy umaabot nga away,” matud pa ni Eman.
Gipaambit usab niya ang iyang kasinatian sa pag-arte sa usa ka umaabot nga television series, diin giangkon niya nga gikulbaan siya apan nalingaw sa bag-ong kasinatian. Bisan pa niana, gihatagan niya og gibug-aton ang importansya sa saktong pagbahin sa iyang oras.
“Kon boxing, boxing lang gyud… focus. Usa-usa lang sa,” dugang pa niya.
Samtang, padayon usab siyang gigiyahan sa iyang amahan nga si Manny Pacquiao, kinsa naghatag kaniya og mga tambag mahitungod sa disiplina, saktong pagkaon, ug igong pahuway.
Matud ni Eman, posibleng magbansay sila og usab sa iyang amahan alang sa iyang sunod nga away karong tuiga. Bisan pa man sa mga pagtandi kaniya sa iyang amahan, gusto ni Eman nga pamatud-an ang iyang kaugalingong abilidad sa maong sport.
Gawas sa boxing, napangutana usab si Eman mahitungod sa iyang relasyon sa aktres nga si Jillian Ward. Gihulagway niya kini isip usa ka “good friend” ug wala na mohatag og dugang detalye mahitungod sa ilang kahimtang, kay matud pa niya, nakatutok siya karon sa iyang pamilya ug karera.
Isip bag-ong ambassador sa IAM Worldwide, nakatrabaho usab niya ang aktor nga si Piolo Pascual, kinsa naghatag kaniya og tambag nga dili makulbaan ug i-enjoy lang ang matag higayon sa showbiz.