Nagmalampuson ang batan-ong gymnast nga si Karl Eldrew Yulo human niya nakuha ang gold medal sa floor exercise sa Antalya leg sa FIG Artistic Gymnastics World Cup Series didto sa Turkey niadtong Sabado, Marso 14.
Kini ang unang gold medal sa 18-anyos nga si Eldrew sa “senior division.” Nakakuha siya og total score nga 14.100, diin iyang gipakita ang taas nga kalidad sa execution nga miabot og 8.800—ang labing taas sa tibuok finals.
Gilabwan ni Yulo silang Eamon Montgomery sa Ireland nga nakuha ang silver (13.833) ug ang Tokyo Olympics silver medalist nga si Rayderley Zapata sa Spain nga nakuha ang bronze (13.333).
Ang maong kadaugan dako og kalainan sa iyang gipakita sa qualification round niadtong Huwebes diin ika-upat lang siya. Kini ang ikaduhang higayon nga misalmot si Eldrew sa senior level human sa iyang dula sa Baku, Azerbaijan sa miaging semana.