Gibatikos sa usa ka law expert ug corporate lawyer kakulangon sa pag-uswag sa anti-political dynasty law sa nasud sa Pilipinas.
Matud pa ni Atty. Oscar Moreno, usa ka eksperto sa balaod, nga lisod mapalabang ang maong balaodnon tgumikan ang mga miyembro mismo sa Kongreso nga mu-apruba niini, kabahin sa mga political dynasties.
Tungod niini, gipadayag sa abogado nga magpabilin lamang nga usa ka teorya ang maong tinguha, bisan pa og unsa ka lawom ang diskusyon kabahin sa maong hisgutanan.
Subling gitumbok sa abogado nga walay kapuslanan ang paghisgot sa mga detalye sa anti-political dynasty law, sama sa “degree” sa kabanay nga gid-an sa pagdagan.
Matud niini, dili ipasa sa mga mambabalaod ang bisan unsang balaodnon nga makadaot sa ilang personal nga interes o dili uyon sa ilang politikanhong pamilya.
Gisaway usab niini ang sistema sa “pork barrel” isip usa sa mga rason kon nganong gipanghingusgan sa mga politiko ang pagpabilin sa ilang pamilya sa gahum pinaagi sa political dynasties.
Matud pa, ang tinguha alang sa usa ka anti-dynasty law magpabilin lamang nga “play of words” kon wala kini sa kasingkasing ug huna-huna sa mga mambabalaod nga mupatigbabaw ang interes sa publiko tandi sa ilang kaugalingong pamilya.