Posibleng makasinati og seryosong epekto sa ekonomiya ug krisis sa trabaho ang Pilipinas tungod sa tensyon sa Middle East nga naglambigit sa nasud nga Iran.
Kini ang gipahayag ni Ray Talimio Jr., kanhi myembro sa Oro Chamber sa Economic Development Committee sa RDC-X, kinsa nagpasidaan nga ang epekto mabatian sa matag panimalay pinaagi sa pagsaka sa presyo sa mga palitonon.
Saysay pa niini, ang Pilipinas isip usa ka “net importer” sa lana maoy unang makatilaw sa hapdos sa maong kagubot. Bisan og dili direktang makiggubat ang Pilipinas, ang pagkabalda sa agianan sa lana gikan sa Saudi Arabia ug uban pang tinubdan sa enerhiya musangpot sa pagsaka sa presyo sa krudo, gasolina ug bill sa kuryente. Kini muresulta sa inflation o ang paspas nga pagsaka sa presyo sa pagkaon ug uban pang batakang panginahanglanon.
Gawas sa aspeto sa kwarta, dako usab ang kabalaka alang sa seguridad sa mga Overseas Filipino Workers (OFWs). Gibutyag ni Talimio nga dili lang ang Iran, US ug Israel ang apektado, kondili lakip na ang tibuok Gulf States sama sa UAE, Dubai ug Qatar diin daghan ang mga base sa Amerika ug dagsang ang mga trabahanteng Pinoy.
Sa katapusan, nagpahimangno ang opisyal nga maglisod ang gobyerno sa pag-atiman kung pananglitan adunay dinaghan nga pagpauli sa mga OFW. Tungod sa kakuwang sa “buffer fund” ug dako nga utang sa nasud, dili garantiya nga mahatagan dayon og trabaho ang mga mouli nga Pinoy. Nanawagan usab kini sa katawhan nga magsugod na sa pagdaginot sa enerhiya aron dili mahurot ang pondo sa pamilya samtang nagpadayon ang krisis.