Gipadayag sa usa ka economic expert nga mihuyang ang ekonomiya sa Pilipinas sa milabayng tuig. Kini tungod sa nagkagamay nga Gross Domestic Product (GDP) ug ang paghunong sa daghang mga proyekto sa gobyerno.
Sa pakighinabi sa Bombo Radyo Malaybalay, kay Ray Talimio Jr., kanhi opisyal sa Oro Chamber ug miyembro sa RDC-X nga ang paglambo sa GDP nagsugod sa 5.3% sa unang quarter ug 5.1% sa ikaduhang quarter, apan kalit kining mius-os ngadto sa 4.0% na lang sa ikatulo nga quarter sa 2025.
Tungod niining kakuwangon, gibutyag ni Talimio nga “imposible” na hapit nga makab-ot ang 5.5% hangtod 6.5% nga target sa Bangko Sentral ng Pilipinas. Aron maapas ang maong target, kinahanglan nga mosaka ngadto sa 7.1% ang ekonomiya sa ika-upat nga quarter—usa ka butang nga lisod na mahitabo.
Gipasabot ni Talimio nga ang pag-undang sa mga proyekto sa DPWH ug uban pang ahensya human sa SONA sa Presidente maoy hinungdan sa pagkunhod sa kalihokan sa ekonomiya.
Matod pa ni Talimio naapektuhan ang paggasto sa gobyerno nga maoy pinakadakong “spender”, hinungdan nga naputol ang gilaumang pump-priming sa ekonomiya, samtang gilauman usab ang pagsaka sa inflation sa ika-upat nga quarter.
Dugang pa niini, nabalaka usab ang eksperto nga mosaka ang inflation o presyo sa mga palitonon karong ika-upat nga quarter dungan sa panahon sa Pasko.
Gipasundayag usab na wala na masustiner ang paspas nga paglambo sa nasod sukad pa niadtong 2023. Makita ang epekto niini sa daghang wala mahuman nga mga tulunghaan, health centers, ug uban pang pasilidad nga gikinahanglan unta sa katawhan.