Padayon ang pag-uswag sa ekonomiya sa Bukidnon nga nagpasabot nga mas daghang oportunidad sa trabaho ug negosyo para sa katawhan.
Matud pa ni Evangeline Non, Chief Statistical Specialist sa Philippine Statistics Authority (PSA)-Bukidnon, nga misaka og 3.8% ang ekonomiya sa probinsya niadtong tuig 2024 nga mas taas gamay kumpara sa 3.7% sa tuig 2023.
Saysay pa ni Non, dako og kontribusyon sa maong pagsaka ang sektor sa serbisyo, ilabina sa Accommodation and Food Services nga mas nilambo tungod sa pagdagsa sa mga turista ug kalihokan, Electricity, Water and Waste Management nga nagpakita og paspas nga development sa imprastraktura,Human Health and Social Work Activities nga misaka samtang nagpadayon ang investment sa healthcare system.
Kasamtangan, mukabat sa P267.77 bilyon ang kantidad sa mga produkto ug serbisyo nga naproduce sa Bukidnon sa tuig 2024.Ang pag-uswag sa ekonomiya giila sa PSA nga timailhan sa paglig-on sa mga industriya ug mas maayong kaugmaon alang sa mga Bukidnon.