Gisugyot karon sa usa ka ekonomista ang pagbuhat og tukmang balaod aron mahimong permanente ug lig-on ang mga programa sa gobyerno, hilabi na kadtong daghang katawhan ang makabenepisyo, subay sa epekto nga namatikdan human sa pagkawala sa Ayuda sa Kapos ang Kita Program kon AKAP.
Sa eksklusibong pakighinabi sa Bombo Radyo Malaybalay kang Ray Talimio, Jr., Former Oro Chamber Economic Development Committee ug miyembro sa RDC-X, gipasiugda niini ang kamahinungdanon sa paghatag og permanenteng kahimtangan sa mga programa sa gobyerno aron masiguro ang padayon nga implementasyon niini ug malikayan ang kalit nga pagkawala.
Dugang pa ni Talimio, nga gawas sa gisugyot nga paghimo og balaod, ang kaso sa pagkawala sa AKAP nagpakita sa panginahanglan nga ipailawom ang maong programa sa Department of Social Welfare and Development kon DSWD, aron adunay klaro nga sistema sa pagpili sa mga benepisyaryo.
Gikaingong pinaagi niini, malikayan nga ang mga opisyales o politiko ang magbuot sa kinsa’y makadawat sa tabang, hilabi na nga adunay mga taho nga ang maong programa nasangpot sa abuso ug dili husto nga pagpanghatag sa benepisyo.
Gipasabot usab niini nga ang pagbutang sa mga programa ilalom sa usa ka ahensya sama sa DSWD makatabang sa pagpalig-on sa transparency, accountability, ug hustisya sa pagpatuman sa social assistance programs sa gobyerno.