Gipaambit ni Cardinal Pablo Virgilio David ang opisyal nga datos gikan sa 2025 General Appropriations Act (GAA) nga nagpakita sa kantidad sa pondo nga gihatag para sa mga mambabalaod sa nasud.
Sumala ni David, ang matag senador adunay tinuig nga budget nga P580.42 milyon, nga kon i-apod-apod sa 24 ka senador, moabot kini og hapit P13.93 bilyon para sa Senado sulod sa usa ka tuig.
Katugbang kini sa hapit P48.37 milyon kada bulan o P1.61 milyon kada adlaw kada senador.
Samtang ang matag kongresista adunay P106.53 milyon kada tuig.
Sa kinatibuk-an nga 316 ka miyembro sa Kamara, moabot kini og P33.67 bilyon para sa House of Representatives.
Kini katugbang usab sa P8.88 milyon kada bulan o P292,598 kada adlaw kada kongresista. Sa kinatibuk-an, ang opisyal nga budget para sa lehislatura sa 2025 miabot sa P47.6 bilyon.
Gibutyag ni Cardinal David nga wala pa kini naglakip sa gitawag nga “commissions” o kickbacks gikan sa mga proyekto, lakip na sa mga pondo gikan sa unprogrammed appropriations ug patronage funds nga moagi sa mga ayuda programs sama sa MAIFIP, TUPAD, AICS, ug AKAP.
Gipasiugda sa Cardinal nga nagpabilin nga dakong pangutana kung giunsa paggamit ang ingon ka dako nga kantidad, labi na nga ang nasud nagkuwang ang mga kwarto sa tunghaan, kulang ang kama sa mga ospital, nag-antos ang mga mag-uuma sa utang, ug nagkinabuhi ang mga trabahante sa kakuwang.
Dugang pa niini, ang P47.6 bilyon para sa mga mambabalaod, bisan wala pa i-apil ang patronage ug commissions, dili lamang moral nga isyu kini kondili usa ka nasudnong isyu.
Gidugang pa niya nga gihulat pa sa mga mamababaload kung pila ang bahin alang sa ilang kaugalingon sa 2026 GAA.