Mukabat sa P397,120 ang kantidad sa illegal nga droga nga nasakmit sa kapulisan sa duha ka operasyon sa syudad sa Valencia.
Sa unang operasyon nga gihimo sa Purok 7, Sinalayan, Barangay Lumbo, nasikop si alias “Ar-ar”, 30 anyos, ug si alias Tuling, 46 anyos.
Atol sa operasyon, misukol si alias “Tuling” ug nakaikyas. Samtang nagdagan, napansin sa mga otoridad nga gilabay niini ang usa ka gamay nga pakete sa gituohang shabu diin nakuha kini llima ka metros ang gilay-on gikan sa gilabayan.
Nakumpiska usab sa operasyon ang laing mga pakete sa illegal nga droga nga adunay gibug-aton nga 50.2 gramos nga nagkantidad og P341,360.
Samtang sa ikaduhang operasyon sa Purok 2, Barangay Lumbo, nasikop usab si alias “Dodong”, 27 anyos diin nasakmit gikan niini ang 8.2 gramos nga illegal nga droga nga nagkantidad og P55,760.
Nakakustodiya na karon ang mga dinakpan sa Valencia City Police Station ug nag-atubang sa kasong Comprehensive Dangerous Drugs Act of 2002.
Samtang ang mga nakumpiskang gituohang shabu gipasa sa Provincial Forensic Unit alang sa eksaminasyon.